Қазіргі таңда мектептерде олимпиадалық есептерді шешу үлкен маңызға ие. Мұндағы негізгі мақсат – оқушының интеллектуалдық қабілетін дамытумен қатар, математикалық қабілеттерін өз ортасында қолдануға үйрету. Үлы математик К. Гаусс айтқандай: «Математика – ғылымдардың патшасы», - десек, «сандар теориясы – математиканың патшасы». Осы орайда, сандар теориясы бөлімі бойынша математика олимпиадаларындағы маңызды тақырыптардың бірі бүтін сандардың бөлінгіштігі болып саналады. «Бүтін сандардың бөлінгіштігі тақырыбы» математикалық олимпиадаларда жиі кездесетін, маңызды тақырыптардың бірі.
Олимпиадаға қатысушы оқушылар үшін өздігінен оқу, тапсырмалар үлгісі арқылы есепті түсіну үлкен маңызға ие. Кез келген уақытта, мұғалім оқушыларға кері байланыс бере алмауы мүмкін, Ал мұндай жағдайларда, әдістемелік құралдар, тапсырмалар үлгісі бар жинақтар оқушыларға таптырмас құрал. Оларды шешу үшін дәлелдеу, ойлау қабілеті қажет. Сондықтан мектеп математикасының дәстүрлі курсын үйірме сабақтары, элективті пәндер арқылы кеңейту керек, мұнда сандардың қасиеттерін зерттеуге көбірек уақыт бөлу керек. Бұл мақалада бүтін сандарды қалдықпен, қалдықсыз бөлу есептерін шешу әдістері, толық шешу үлгісімен нақты мысалдар келтіріледі. Оқушылардың есепті түсінгендігін білу үшін, алған білімді бекіту ретінде, оқушының өзіндік жұмыс жасауына тапсырмалар берілген. Тапсырмалар сыныптар бойынша күрделілігіне, оқушылардың түсіну деңгейіне қарай құрастырылды.